Friday, June 19, 2015

ဖန်တရာထေသုတေသနများမှ လက်တွေ့အသုံးချ သုတေသနများထံသို့ မျှော်ကြည့်ခြင်း



ဖန်တရာထေသုတေသနများမှ လက်တွေ့အသုံးချ သုတေသနများထံသို့ မျှော်ကြည့်ခြင်း


မြန်မာပြည်တွင်လာဖွင့်ထားသော နိူင်ငံခြားကုမ္ပဏီကြီးတစ်ခုတွင် လုပ်ကိုင်နေသည့် မားကတ်တင်းမန်နေဂျာတစ်ဦးနှင့် စကားလက်ဆုံကျရင်း မြန်မာပြည်ဈေးကွက်ကို မည်ကဲ့သို့သော နည်းဗျုဟာများဖြင့် ထိုးဖောက်နေပါသလဲဟု မေးကြည့်ရာ စားသုံးသူစစ်တမ်းပေါ်မူတည်၍ အစီအစဉ်များချမှတ်လုပ်ဆောင်နေရသည်ဟု သိလိုက်ရသည်။မြန်မာနိူင်ငံတွင် ဈေးကွက်စစ်တမ်းကောက်ယူနေသော ကုမ္ပဏီများရှိပြီး ယင်းကုမ္ပဏီများထံမှဈေးကွက်စစ်တမ်းများကို ပြည်တွင်းပြည်ပကုမ္ပဏီများက လစဉ်ဒေါ်လာရာနှင့်ချီပေး၍ ဝယ်ယူအသုံးပြုနေရကြောင်း ယင်းမန်နေဂျာက ဆက်လက်ပြောသည့်အခါ တွေးစရာအတွေးစများပေါ်လာပါတော့သည်။


တက္ကသိုလ်ကျောင်းသားများ နောက်ဆုံးနှစ်ရောက်သည့်အခါ၊မဟာတန်းတက်သည့်အခါ စာတမ်းငယ်များ၊ကျမ်းများ၊သုတေသနများအဆက်မပြတ်လုပ်ကိုင်ကြရသည်။သို့သော်လည်း ယင်းလုပ်ဆောင်ချက်များ၏ ကိုးဆယ်ရာခိုင်နှုန်းခန့်မှာ တက္ကသိုလ်စာကြည့်တိုက်တွင်သာ အိပ်ပျော်နေကြပြီး လက်တွေ့လုပ်ငန်းခွင်ထဲတွင်၊စီးပွားရေးနယ်ပယ်များတွင် အသုံးမပြုနိူင်သည်မှာ အဘယ့်ကြောင့်ပါနည်း။
အမေရိကန်နိူင်ငံတွင် ဆယ့်ခုနှစ်နှစ်နီးပါးနေထိုင်လာခဲ့ပြီး ယခုမှ မြန်မာပြည်သို့ အလည်ပြန်လာသော အကိုကြီးတယောက်နှင့် သုတေသနစစ်တမ်းများအကြောင်း ထပ်မံစကားပြောဖြစ်ပါသည်။ယေဘုယျအားဖြင့်ပြောရလျှင် သူတို့ဆီတွင် တက္ကသိုလ်ကျောင်းအများစုသည် စီးပွားရေးလုပ်ငန်းကြီးများနှင့် ချိတ်ဆက်ထားကြသည်။စီးပွားရေးကုမ္ပဏီကြီးများက ၎င်းတို့လုပ်ငန်းတွင် အသုံးပြုမည့်တစုံတရာနှင့်ပက်သက်ပြီး သုတေသနလိုချင်ကြောင်း ပြောသည့်အခါ တက္ကသိုလ်အာဏာပိုင်များက ကျောင်းသားများကို အသိပေးလိုက်သည်။ ယင်းသုတေသနကိုလုပ်ဆောင်မည့်ကျောင်းသားများကိုလည်း ကုမ္ပဏီက လိုအပ်သည့်စရိတ်စကများ ထောက်ပံ့ပေးသည်။ ဤသို့ဖြင့်ပင် တက္ကသိုလ်ကျောင်းသားများအဖို့ ကျောင်းတက်ရင်း ဝင်ငွေတဖက်တလမ်းက ရသကဲ့သို့ အမှန်တကယ်လုပ်ငန်းခွင်တွင်အသုံးတည့်မည့်သုတေသနများ မည်သို့မည်ပုံလုပ်ဆောင်ရမည်ဆိုသည်ကို ကောင်းကောင်းကြီးနားလည်သွားကြသည်။ မအောင်မြင်သည့်သုတေသနများစွာရှိသော်လည်း အောင်မြင်သည့်၊ အလုပ်ဖြစ်သည့်သုတေသနများစွာပေါ်ထွက်လာခဲ့၊ပေါ်ထွက်နေဆဲ၊ပေါ်ထွက်လတ္တံ့ဖြစ်ပါသည်။
တက္ကသိုလ်ကျောင်းသားဟောင်းတစ်ဦးအတွက် လွန်စွာဝမ်းသာစရာကောင်းသော သတင်းတခုကိုဖေဖော်ဝါရီငါးရက်နေ့က ဖတ်လိုက်ရပါသည်။ကျောင်းသားသမဂ္ဂငါးခုဦးစီးကျင်းပသော Student Show2015ကို MICT Parkတွင် နှစ်ရက်ကြာကျင်းပခဲ့ပြီး မိမိကျောင်းတွင် မိမိတို့ဘာသာပြပွဲလုပ်သည်ထက် ယခုလိုအများပြည်သူသိအောင်ပြသလိုက်ခြင်းကြောင့် ကုမ္ပဏီများလည်းမြင်သွားကာ အလုပ်အကိုင်အခွင့်အလမ်းများပေါ်ပေါ်လာစေရန် ရည်ရွယ်ခြင်းဖြစ်ကြောင်း ယင်းပြပွဲတွင်ပါဝင်သည့်ကျောင်းသားတစ်ဦးက ပြောသည်ကိုဖတ်လိုက်ရသည့်အခါ ပို၍ဝမ်းသာမိပါသည်။အမှန်တကယ်အားဖြင့် မြန်မာနိူင်ငံမှမဟုတ်ပါ၊ကမ္ဘာ့နိူင်ငံအသီးသီးတွင်ပင် ဘွဲ့ရပြီးကျောင်းသားများအလုပ်အကိုင်ရှားပါးမှုပြသနာဖြင့်ကြုံနေရသည်ကိုသိရန်လိုပါသည်။ ကျောင်းပြီးမှ အလုပ်လိုက်ရှာမည့်အစား ကျောင်းတက်ရင်းလုပ်ငန်းလုပ်သည့်အတွေ့အကြုံကောင်းကေင်းရှိထားပါလျှင် ကျောင်းပြီးလျှင် အလုပ်က မိမိအားလိုက်ရှာနေမည်သာဖြစ်သည်။အထူးသဖြင့် မိမိအထူးပြုယူထားသည့် ဘာသာရပ်နှင့်ဆက်စပ်သည့်အလုပ်အကိုင်ဆိုလျှင် ပိုအကျိုးရှိမည်ဖြစ်သည်။

ဖန်တရာထေသုတေသနများ
သမိုင်းပညာရှင်ကြီးဒေါက်တာသန်းထွန်းပြောခဲ့သော စကားတခွန်းကိုသတိရမိပါသည်။ စာရေးဆရာအသင်းရဲ့အလုပ်ကြီးတစ်ခုက စာဆိုတော်နေ့(နတ်တော်လဆန်းတစ်ရက်ဝန်းကျင်)မှာ စာပေဟောပြောပွဲ၊စာတမ်းဖတ်ပွဲလုပ်တယ်။အဲဒီအခါ တချို့က မိန့်ခွန်းတခုပဲ ပြင်ဆင်ပြိးရောက်လေရာမှာ ဒါပဲပြောတယ်။ ပရိသတ်ကလည်း ရီရတယ်ဟဲ့ဆိုပြီး လက်ခုပ်တီးကြတယ်တဲ့။ ကျွန်တော်တို့ တက္ကသိုလ်ကျောင်းများတွင်လုပ်ဆောင်နေသည့် သုတေသနစာတမ်းများသည်လည်း ဆရာကြီး ဒေါက်တာသန်းထွန်းပြောသလို ဖြစ်နေမလားဟု တွေးမိပါသည်။ ရှေ့လူလုပ်ထားပြိးသော ခေါင်းစဉ်နှင့် ဆင်တူယိုးမှားခေါင်းစဉ်များသာ လုပ်ကြပြီး ခေါင်းစဉ်အသစ်ဖြင့် သုတေသနလုပ်သည့် ကျောင်းသားများတော်တော်နဲလှပါသည်။ နောက်တချက်ပြောရမည်မှာ ယင်းခေါင်းစဉ်များသည် အမှန်တကယ်အားဖြင့် လက်တွေ့မဆန်လှသကဲ့သို့ ကျောင်းပြီးလျှင်လည်း မည်သည့်နေရာတွင်မှ ပြန်သုံးမရသည့် စာတမ်းများ၊ကျမ်းများသာ များလှပါသည်။ရှားရှားပါးပါးဖောက်ထွက်သည့် စာတမ်းတစ်စောင်တလေသာ ရှိတက်ပါသည်။

လက်တွေ့အလုပ်ဖြစ်ဖို့ ဘယ်လိုလုပ်ကြမလဲ
ဆန္ဒပြစရာမလိုပါ။ပထမဦးစွာ ဒီဘိတ်လုပ်ရမည်ဖြစ်ပါသည်။ Debateဆိုသည့်စကားရပ်မှာ အမှန်တကယ်အားဖြင့် တက္ကသိုလ်ကျောင်းသားသူများအတွက် မစိမ်းလှပါ။မြို့ပြတွင်နေထိုင်ရခြင်းသည် ကျေးလက်တွင်နေထိုင်ရခြင်းထက် ပိုမိုကောင်းမွန်ပါသလား.ကျောင်းတက်နေခိုက်အလုပ်လုပ်ခြင်းသည် ကျောင်းသားများအတွက် ပိုကောင်းသလား၊မကောင်းဘူးလားစသည့် ခေါင်းစဉ်များဖြင့် စာမေးပွဲတွင် မေးလေ့ရှိပါသည်။သို့သော်လည်း Debate များသည် စာမေးပွဲဖြေရုံမျှအသုံးဝင်သည်မဟုတ်ပါ။ နေ့စဉ်ဘဝများထိပါ အသုံးဝင်ပါသည်။ လက်တွေ့အသုံးချနိူင်သည့်အဆင့်ရောက်အောင် ကြိုးစားရမည်ဖြစ်သည်။

Debateဘာကြောင့် လုပ်ဖို့လို
Debateဘာကြောင့် လုပ်ရသလဲဆိုသည့်နှင့်ပက်သက်၍ အဖြေမျိုးစုံရှိနိူင်သော်လည်း အနီးစပ်ဆုံးပြောပါဆိုလျှင် ကိစ္စရပ်တခု၏အကောင်းအဆိုးများကို နှိုင်းယှဉ်တွက်ဆကာ အကောင်းဆုံးရလာဒ်ထွက်ပေါ်နိူင်မည့်ကိစ္စရပ်ကိုရွေးချယ်ရခြင်းဖြစ်သည်။ဥပမာအားဖြင့် သင့်မြို့တွင် ကျောက်မီးသွေးစက်ရုံတည်မည်ဆိုပါစို့။ယင်းစက်ရုံကို တည်ဆောက်ခြင်းအား လက်ခံသည့်အုပ်စုနှင့် လက်မခံသည့်အုပ်စုဟူ၍ နှစ်မျိုးကွဲမည်ဖြစ်သည်။အကယ်၍ သင်သည် ကျောက်မီးသွေးစက်ရုံကို လက်ခံသည်ဆိုလျှင် ယင်းစက်ရုံသည် ပတ်ဝန်းကျင်အတွက်ဘေးကင်းသည်ဆိုသည်ကို ပြနိူင်မည့်အချက်အလက်များ၊စစ်တမ်းများစုဆောင်းရမည်ဖြစ်သည်။ထို့အတူ ကျောက်မီးသွေးစက်ရုံမှ အန္တရယ်ဖြစ်စေနိူင်သည့်အချက်အလက်များ၊စစ်တမ်းများကိုလည်း ရှာဖွေရမည်ဖြစ်သည်။ပြီးမှ အကျိုးနှင့်အပြစ်ကို နှိုင်းယှဉ်ပြသရမည်ဖြစ်သည်။လက်တွေ့လူမှုဘဝနယ်ပယ်တွင် Debateဆိုသည်မှာ အနာဂတ်အစီအစဉ်နှင့်ပက်သက်၍ ဆုံးဖြတ်ချက်ချရန်အတွက် ငြင်းခုံဆွေးနွေးကြခြင်းဖြစ်သည်။

Debateတွေက ဘယ်နေရာမှာ အသုံးချနိူင်သလဲ
မန္တလေးမြို့နာမည်ကြီးအင်တာနေရှင်နယ်ကျောင်းတစ်ခုကို တည်ထောင်ထားသူတစ်ဦးနှင့် အင်္ဂလိပ်စာအကြောင်းပြောဆိုရင်း အင်္ဂလိပ်သဒ္ဒါအကြောင်း စကားဦးလှည့်သွားပါသည်။၎င်းက သူ့တွင် သားတယောက်၊သမီးတယောက်ရှိပြီး သားကြီးဖြစ်သူကို အင်္ဂလိပ်စာ ရေးတက်ဖတ်တက်စေရန်သဒ္ဒါအရင်သင်ပေးပြီးမှ စကားပြောသင်ပေးကြောင်း၊သမီးဖြစ်သူကိုမူ အင်္ဂလိပ်စကားပြောကိုသာ အရင်သင်ခိုင်းပြီး သဒ္ဒါကိုလုံးဝသင်မပေးကြောင်း၊ယခုအခါ သမီးဖြစ်သူမှာ အင်္ဂလိပ်စာကို ဂျောင်းဂျောင်းပြေးပြောနိူင်နေပြီဖြစ်သော်လည်း သားကြီးဖြစ်သူမှာ သမီးလောက်မပြောနိူင်ကြောင်း ပြောပါသည်။ဤတွင် အငြင်းပွားစရာမှာ အင်္ဂလိပ်သဒ္ဒါသည် ကလေးငယ်များအတွက် အရေးပါသေးလား၊အရေးမပါတော့ဘူးလား၊ကလေးငယ်များကို အင်္ဂလိပ်စာသင်ပေးရာတွင် အင်္ဂလိပ်သဒ္ဒါနှင့် အင်္ဂလိပ်စပီကင်မည်သည်ကို အရင်သင်ပေးသင့်သလဲဆိုသည့် ကိစ္စရပ်များ တသီတတန်းကြီးဖြစ်လာပါတော့သည်။ရပ်တည်ချက်တခုပေါ်မူတည်၍ ဝိဝါဒအယူအဆများ ကွဲပြားမည်သာဖြစ်သည်။ ဤတွင် အနီးစပ်ဆုံးအဖြေမှန်တခုရနိူင်ရန်အတွက် သုတေသနစစ်တမ်းများ လိုအပ်လာပြီဖြစ်သည်။

နင့်အလှည့် ငါ့မေး၊ ငါ့အလှည့် နင့်မေး စစ်တမ်းများ
သုတေသနလုပ်ပါ၊စစ်တမ်းကောက်ပါဆိုလျှင် ပြည်တွင်းကျောင်းသားအများစုမှာ မိမိအတန်းမှ အခန်းဖော်ကျောင်းသားများကိုမုန့်ကျွေး၍ဖြစ်စေ၊တခြားအခန်းမှာ ကျောင်းသားသူများကို အကူအညီတောင်း၍ဖြစ်စေ စစ်တမ်းကောက်လေ့ရှိပါသည်။မင်းစစ်တမ်း ငါ့ကိုမေး၊ငါ့စစ်တမ်းကျ မင်းဖြေပေးဆိုသည့် စစ်တမ်းကောက်သည့်ပုံစံမှာ မြန်မာနိူင်ငံတနိူင်ငံတည်းတွင်သာ ရှိတက်သည့် စစ်တမ်းမျိုးဖြစ်ပါလိမ့်မည်။တကယ့်လက်တွေ့ဘဝကို ထင်ဟတ်နိူင်သည့်၊ ပြန်အသုံးချနိူင်သည့်စစ်တမ်းများလည်း မဖြစ်ခဲ့ပါ။ မိမိအင်္ဂလိပ်စာမဟာတန်းတက်စဉ်က ကျောင်းနေဘက်သူငယ်ချင်းတစ်ဦးက ဘွဲ့ရကျောင်းသားများ၏ အင်္ဂလိပ်စာအခြေအနေဆိုသည့်ခေါင်းစဉ်ဖြင့် စာတမ်းတစောင်ပြုစုသည်။ အသင့်ြ့ပုစုထားသည့် မေးခွန်းများရေးသားထားသည့်စာရွက်လေးများကို မိမိတို့လာပေးကာ ဖြေခိုင်းသည်။ နောက်တရက်တွင် နောက်ထပ် အခန်းဖော်သူငယ်ချင်းတစ်ဦးက ဘွဲ့လွန်ကျောင်းသားများ၏အင်္ဂလိပ်စာအရည်အသွေးဆိုသည့်ခေါင်းစဉ်ဖြင့် မိမိတို့ကိုပင် စစ်တမ်းလာကောက်ပြန်ပါသည်။ စစ်တမ်းကောက်သူများက မုန့်ဝယ်ကျွေးလေ့ရှိရာ မိမိတို့မှာ မုန့်များတပျော်တပါးစားရင်း၊စစ်တမ်းများကိုပေါက်ကရဖြေခဲ့ကြသည်ကို ပြန်မှတ်မိပါသည်။ အမှန်တကယ်လူထုကြားထဲမဆင်းပဲ ကောက်ထားသည့်စစ်တမ်းများသည် မည်သည့်နေရာတွင်မှ သုံးစားမရနိူင်ဆိုသည့်အချက်ကို ထိုစဉ်ကတော့ သတိမပြုခဲ့မိပဲ ဘွဲ့တခုလွယ်လွယ်ကူကူရစေရန်သာ ဦးတည်ခဲ့ကြသည်ကို မှတ်မိပါသေးသည်။ ဘွဲ့များလည်း အသီးသီးရခဲ့ကြပါသည်။ သို့သော်လည်း မိမိတို့လုပ်ခဲ့သည့်စစ်တမ်းများမှာ ကျောင်းစာကြည့်တိုက်တွင် အခန့်သားအိပ်နေသည့် မည်သည့်နေရာတွင်မှ အသုံးမချနိူင်သည့် ကျမ်းအိပ်များ ဖြစ်နေပါတော့သည်။

ရှေ့တွင်ပြောခဲ့သည့် စကားစကိုပြန်ကောက်လျှင် သုတေသနစစ်တမ်းတိတိကျကျရေရေရာရာမရှိသော ကျွန်တော်တို့နိူင်ငံတွင် ဝိဝါဒကွဲပြားစရာများစွာရှိပါသည်။မူကြိုကလေးငယ်များကို အရေး၊အဖတ်၊အပြောမည်သည့်အပိုင်းက စသင်ပေးမလဲ၊မည်သည့်အပိုင်းက စသင်လျှင် တက်ကျွမ်းမှုပိုများသလဲ..မူကြိုကလေးငယ်များကိုထပ်မံခွဲခြားလျှင်ပင် အစိုးရကျောင်းထားမည့် မူကြိုကလေးငယ်လား၊ပုဂ္ဂလိကကျောင်းများတွင်ထားမည့်ကလေးငယ်များ၊အင်္ဂလိပ်စကားပြောနှင့် အထိအတွေ့ရှိသော နေရာ၊အင်္ဂလိပ်စကားပြောအထိအတွှေ့မရှိသောနေရာ၊အင်္ဂလ်ိစကားကို အဓိကဘာသာစကားအဖြစ်သင်ကြားမည့်ကလေးလား၊ဒုတိယဘာသာစကားအဖြစ်သင်ကြားမည့်ကလေးလားစသည်ဖြင့် အမျိုးအစားမျိုးစုံထပ်ခွဲရမည်ဖြစ်သည်။ပြီးမှ မိမိပြုစုမည့်စာတမ်းသည် မည်သို့သော ပတ်ဝန်းကျင်တွင် ကြီးပြင်းမည့် မည်သို့သော ကလေးငယ်အတွက်ရည်ရွယ်ကာ မည်သို့မည်ပုံလုပ်ဆောင်မည်၊မည်သည့်နယ်ပယ်များတွင်ကျင်လည်နေသည့် ကလေးငယ်များ၊မိဘများကို အရေအတွက်မည်မျှထိ စစ်တမ်းကောက်မည်စသည်ဖြင့် ယေဘုယျမှ အသေးစိတ်ထိ စိစစ်ကာ သုတေသနတိတိကျကျလုပ်လျှင် ထိုရလာဒ်များသည် လက်တွေ့အသုံးချနိူင်သည့် အဆင့်ထိရောက်နိူင်မည်ဖြစ်သည်။

အများအားဖြင့်ယူပါ
မိမိပညာရေးအတွက် လုပ်ဆောင်ရမည့် သုတေသနစစ်တမ်း၊စာတမ်းတစ်စောင်ကို ဤမျှလောက်အသေးစိတ်အချိန်ယူလုပ်ကိုင်ရန်အတွက် အချိန်၊ငွေကြေးအခက်အခဲကို မည်သို့မည်ပုံဖြေရှင်းမလဲဆိုသည့် မေးစရာမေးခွန်းတစ်ခုပေါ်လာပါသည်။ဤတွင် အထက်က ကျောင်းသားသမဂ္ဂများ၏လုပ်ဆောင်ချက်များကိုအတုယူရန်ပေါ်လာပါတော့သည်။တယောက်အားဖြင့်ယူသော်မရ၊အများအားဖြင့်ယူသော်ရ၏ဆိုသည့်စကားပုံကို မေ့မထားရန်အရေးကြီးပါသည်။ ကျောင်းသားသမဂ္ဂဖြစ်စေ၊သမဂ္ဂအမည်မခံသောကျောင်းသားအဖွဲ့များဖြစ်စေ၊ စိတ်တူကိုယ်တူသူငယ်ချင်းများစုပေါင်း၍ဖြစ်စေ ဝိုင်းဝန်းငြင်းခုံဆွေးနွေးကာ မိမိယူထားသည့် မေဂျာအလိုက်မည်သည့်ကိစ္စကိုအထူးပြုကာ စစ်တမ်းကောက်၊ သုတေသနလုပ်မလဲဆိုသည့်ကိစ္စကို အဖြေရှာရန်ဦးစွာလိုအပ်ပါသည်။ ပြည်တွင်းသို့ဝင်ရောက်လာသည့် နိူင်ငံခြားကုမ္ပဏီများ၊ ပြည်တွင်းအင်အားကြီးကုမ္ပဏီကြီးများ၊NGOs၊INGOsများသည် မည်သည့်အချက်များကို သိချင်နေသလဲဆိုသည့်ကိစ္စရပ်ကို တိတိကျကျသိရှိစေရန်အတွက်လည်း ကျောင်းသားများစုပေါင်းပြီး သွားရောက်ချိတ်ဆက်ညှိနှိုင်းရန်လည်းလိုအပ်ပါသည်။ ထို့အတူ မိမိတို့၏ သုတေသနစာတမ်းများကို ကြိးကြပ်ဆောင်ရွက်မည့် ဆရာ၊ဆရာမများနှင့်လည်း နှီးနှောတိုင်ပင်ရပါမည်။ ဘက်စုံထောင့်စုံအားလုံးချိတ်ဆက်ကာ ကြိုးစားဆောင်ရွက်လျှင် တဖြေးဖြေးနှင့် နောင်အနာဂတ်တွင် တက္ကသိုလ်ကျောင်းသားသူများ၏သုတေသနစာတမ်းများသည် အမှန်တကယ်အလုပ်ဖြစ်သော၊ တိုင်းပြည်အတွက် လွန်စွာအကျိုးရှိသော၊ပြည်သူများအားထားရသော သုတေသနစာတမ်းများအဖြစ်သို့ ကူးပြောင်းရောက်ရှိလာမည်ဖြစ်သည်။                                             သုတေသနစာတမ်းများ၊စစ်တမ်းများအမှန်တကယ်ထိထိရောက်ရောက်လုပ်ဆောင်နိူင်ပြီဆိုလျှင် တနွယ်ငင်တစင်ပါဆိုသလိုပင် ငွေကြေးအထောက်အပံ့များအတွက်လည်း ပူစရာမလိုပါကြောင်း တိုက်တွန်းရေးသားလိုက်ရပါသည်။
-       ဖိုးစမ်းချောင်း(GG)


0 comments:

Post a Comment